暑假又嚟啦，今年有个全城瞩目嘅嘉年华－「荔园Super Summer 2015」，阔别港人近 18 年后重临香港，明日（6 月 26 日 6pm）正式开幕啦。今日我女版主率先入场，淋住雨同大家试探新荔园有乜玩。

开放日期及时间

时间：上午 11 时至下午 11 时

位置
新荔园位于中环海滨活动空间，沿着IFC往港外线码头方向的天桥，一直行到10号码头，就会见到荔园城堡门口啦。留意场地为户外，落雨地面会有泥水，白鞋新鞋就尽量避免啦。

收费
新荔园入场费全免，场内共有 50 个景点及游戏，当中 6 个为免费景点，其余为收费游戏。代币收费每个 $10，可以在场内购买，接受现金、八达通、信用卡及银联付款。另外亦设有快证 Fast Pass，定价 $680，包括快证识别手腕带两条、 40 个代币及荔园纪念品两份。

经典游戏 Best Pick

吸蕉大笨象（收费：1枚代币）
新一代嘅机械象仿照旧荔园明星象 TINO 而製成，一入门口就见到，一样可以餵蕉，仲识得喷水、眨眼同发声。不过毕竟係机械嘅野，始终无法取代活生生嘅 TINO，最大优势可能係佢啲便便唔臭，亦唔需要太大空间活动。
好玩度：***

魔灵小学（收费：8枚代币）
一般鬼屋都係由真人扮演猛鬼「靠吓」，新荔园魔灵小学就加入科技元素，玩家要利用手机App 去捉鬼。App 採用 AR 扩增实境技术，将手机镜头对準鬼屋内的「降灵符」，就会见到各种鬼魂怨灵在屏幕上现身，成功收伏就可以获得积分，换取礼品（详情见另文）。鬼屋内阴阴森森，你以为望住手机芒扮捉妖天师嚟行好轻鬆？沿路随时会有真鬼弹出嚟吓你一跳架！
好玩度：*****

恐龙屋（收费：4枚代币, 小童2枚代币）
新恐龙屋同旧版唔同，变成大型滑梯，有 5 米高，沿住恐龙尾一直瀡到尾。小朋友玩都有返咁上下刺激，大人玩都唔算太小儿科，记得拎埋大会提供果张竹垫，瀡嘅速度快好多架！
好玩度：***

易玩易中摊位

每次玩呢类大型嘉年华，指定动作係玩摊位赢奖品，又食又拎至开心。女版主精选场内三个最易赢奖品嘅摊位，包你可以好似小妹咁，抱走上图大中小笨象（俾女朋友）高高兴兴咁离开，当然，唔使再提，首先，你要有……代币。

扔阶砖赢香口胶（收费：1枚代币扔2次）
经典中嘅经典，只要抛中代币到阶砖上又唔踩界，就可以赢到香口胶；如果成功抛中彩色阶砖，仲可以赢走特大绿箭Cushion。

彩色乒乓波（收费：2枚代币）
碌乒乓波无需高技术，放低个波就得，碌中蓝色就有五分，黄色三分，绿色一分，如此类推。而碌中五分就有小笨象，十分就有一只中笨象，十五分就有大笨象，小妹都成功过几次，是咪好简单呢。

逃学威龙（收费：2枚代币）
其实即係扔粉刷，将粉刷狠狠扔向纸板公仔，扔中又唔跌落黎就算赢。扔中头部就有大奖，瞄準少少大力少少都会中，男生基本上都会扔得中。

打卡影相位门口荔园城堡属必影景点，自拍合照打卡良品。

小子大名露宝，呢个小露宝阵人人皆要影。

场内设有小忌廉主题餐厅同摊位，影相就一流；餐厅 7 月 26 日起会换成足球小将主题。